Singapore ka muhna ciangciang:

Note: "Zomi Inkuan (Singapore) te enhuai lua" cih pen ka gelh khit ma in save ka sawm leh Send kha in, a behlapna hih lai ah hong at khawmta mai ning.

i. ZIS enhuai lua uh: Kithumang diamdiam in nasem khawm diamdiam uh ahih manin enhuai lua uh hi. Ka om sung ni 2 sungin zong Malaysia ah a lah ding uh Zomi Ngeina Lam sinin nungak tangval kikhawm uh a, hanciam takin gualnuam uh hi. Nungak tangval lai a hih bang hun nuam adinga kikhawl khawm thei te hampha kasa hi. Kei zong amau lam loh sung teng a Khuang leh Zam leh Sialki leh Dak te ka va tum thapai hi. Ka lungsim khat ah KL lam ah kidiang phei mai leh ut huai si e ka ci hi. (KL = Kuala Lumpur).

A tenna khuasung uh lah niin kimu lo, vuikhu kidiik lo, moto leh Bus khempeuh lah AC hi in kualum khuavot kiphawk lo a, khuasung vak peuh leng ak ek, bawng ek, vawk ek sikkhak ding i khedap niin ding cih lauhna om vetlo hi. Siangtho takin kizem sitset in a lim a al ne in a nuamsa uh hi mai hi.

Delhi khawng tawh teh in kikhopna lah nai no hi a, a paina zong hamsa lo hi. A nasep sung uh ahih kei buang leh kikhop pen thupi sim uh a, kei kikhopni bangin mipi biakinn sung dim zihziah hi. Mai kum ciang a kikhopna mun uh a khan kei uh leh a hawmthawh phial tam ci ing. Lai Siangtho leh Labu pen inn lam pan pua ciat uh a, kikhopna ah mipi kikim ding Labu nei in koih dimdiam uh a, a kisam omlo hi. La makai leh tumging tum siam pen Zomi khempeuh in i theihsa hi a, Kawlgam pan hong pai sanggam te Guiter leh Keyboard siam dan i theih ciat sa hi. La makai te siam in lasak nuam a, koi mun peuh ah Lasak Khoppi (Worship Festival) a bang pahpah hi cih pen i theihsa hi.

Ahi zongin ka ngaihsutna khat ah hih hong om. A dik diam thei kei ing. Ahi zongin hong gen nuam pong ing. Tu ciangciang ah nu leh pa in tate a pattah dan ah (ahih kei leh sangkahte in zong a ngaihsutna khat vuah om ahi tam ci ing) - tate nek cing baih pen ding laisim sak hiam cih ka muh dan hi.

Ka cihnopna ah laisiam pipi medical khawng a zo mahmah ding kimlai pen a nekcing baih ding Nurse simsak pak in innsungah bel kizang thei pah takpi hi. Ahi zongin Nurse a sin kumkhat kum nih behlap in a sangzaw a tungthei ding, innsung pan zong a kahsak zo ding kimlai misiam ding tampi a tunna ding tan tunglo in a pilna sin hun ki bawhtan sak hiam ka ci hi. A kiallap, a nekcing baih zong thupi mah, ahih zo te in a lianzaw, a thupi zaw hanciam leeng thupizaw kaan hilo hiam cih tutung ka lungsim ah hong lut khat hi.

Diploma in IT or Engineer pen kiallap mahmah, ahi zongin degree tawh kiteh theilo hi, mate?

ii. Singapore ka muhna ciangciang: Mikangte tampi ka muh pah na panin 'hih gam pen nuam hi ding hi' cih ka lungsim ah hong ompah hi. Nasepna hang hilo a khualzin mawkmawk te in anawkna gam pen gam nuam hi ding cih ka muh dan hi. Lawm Suan kiangah ka gen pah a, "ko kiang sangin no kiangah mikang khualak vaak tamzaw in hih khua pen thupi zaw ding hi" ka ci hi. Tua bang gen kawmkawm in ama moto tawh khuapi sung ka tai kawikawi uh a, ka muh behlap sem sem uh hi.

Singapore Night Safari ah ka hawh uh a, ana tam seem uh hi. Japan sangnaupang leh Korea te zong tampi mah na om kik uh a, gam khangto te in na veh mahmah uh hi cih ka mu pah hi.

India mivomte zong nasem in lampi gei khawngah lamto in khua-ul luang thilthel in na om uh a, a dialkaih mah uh tawh na kitun lingleng uh hi. Khuasung moto lampi pen a kithek, a kiphop, ahih kei leh a ki repair pen na tam pian in a lamvomza kizut zong pan pian in ka mu a, tua ah bel Taiwan demzo kei leh kilawm sa ing. Khuasung traffic hawm dan, moto lampi neu dan leh mihing khe tawh khualak vaak a tam dan ah ko omna lam bel pha kei deuh leh kilawm sa ing ka ci hi.

A tualo sumbawlna inn, van zuakna leh sumbuk cihte zong a nasia a, mihing zong tam veve in khuapi zong lui or upa mahmah ahih manin a thaksuaksak zozo zaw uh kasa hi.

A mihing tamzaw sente ahih manin a melhoih dan uh kibanga, city harvest Church ah ka kikhopna vuah nungak nih tawh maan ka kilak uh leh 'a liante gel kituak in, a neute gel kituak hi' cih lawmte ciamnuih kam pan ka za kik hi.

Sen nungakte in zolia pen a pha dekdek uh hita mawk ei.