Khuapi tuam ah lungsim tuam:

Mihing in ei mizia tuam ciat i neih bangin khuapi i cih in zong zia tuam ciat nei hi in ka ngaihsun hi. A khuapi sunga teng mihing te kikhualzia kikhel kei mah leh a khuapi zia khat in a mite hencip hiam ka ci hi. Khuapi khatah mi nuamsa mahmah sa pen khuapi dang khat ah om siam hetlo thei hi. Om siam lo ka cih ciang om lem theilo, ki adjust theilo ka cihnopna hi. Khuapi khat ah a citak mahmah khat pen khuapi dang khat ah a cihtakna teng manghiau thei hi.

Delhi pan a khatveina innlam hong ciah in lawmte khat in, "shillong omlai kong bat kei leh lamdang ana sa ken aw, a boruak (a huihdiik a cihnopna) tuam ahi" hong ci hi. A gennop pen mihing kikhualna tawm, apna apna (hindi hi a, nang ma om bangbang, nang ngaihsut bangbang, ahih kei leh nang leh nang kingaihsun in cihna) hi pian hi. Tua ahih manin 'angsung kong theih luat leh zong lamdang na sa kei in, tua bang nuntakna huih va diik kha ing' a ci nuam na hi gige hi.

Leitung khuapi te en kawikawi leng laisimna lam a uangbawl khuapi om a, kimawlna a uangbawl khuapi om a, summeet bawlna a uangbawl khuapi om a, limciinna lam a uangbawl khuapi om hi. Tua mah bangin gam ukna leh kumpi hih ding a hanciam khuapi om a, a khua tuam tawh kizui in mintuam ciat na nei uh hi.

Zogam ah zong ZOHEISA lasa te in Zogam Khuapi te ciin la phuah uh a, tua a khuamin te nuntakzia, a thupi bawl uh, a uangbawl uh nate en leng kibang lo hi. Zomi tenna Champhai leh Moreh ah summeet bawlna ki uang bawl hi. Tua bangin thupi bawl lam ciat na nei uh hi.

Tua ahih leh khuapi zia i cih pen koipan hong piang ahi tam? A khua in a neihsa ahi diam? A mihing tengte lungsim hong kilat khiatna ahi zaw tam? Mizogam ah Aizawl khuapi sungah kumpi kumkhat sumzat zah ah 80 (80%) pen kizang hi kici a, tua manin zong huaiham in sum deihna lian mahmah hi. Shillong pen mikang hun lai pek pan laisimna munpi hi a, tuni tanin pilna kithupi sim mahmah hi.

Zomi i tenna khuapi te, en i deep zo kei a (influence zolo), i tenna khuate in Zomi lungsim hong deep zaw hi. Tua manin i tenna khuapi te lungsim puak dan kizui pah, ki copy pah a, kila pah hi. Tua bang ahih leh nang koi khua ah na teng ut a, koi khua ah na khangkhia nuam a, bang lungsim tawh na khangto nuam ale? Ki itna omna khua ah na ut hiam, ki hazatna khua ah na utzaw hiam?

Khuapi lungsim icih mipi lungsim hi a, mipi lungsim i cih mimal lungsim kigawm pan hong piang hi. Na mimal lungsim hoih tawh mipi lungsim na bawlzo diam? Na bawlthei diam? Na khek thei diam?