Tho tho tho, lum ta ding...

Zogam khua neu khat a misi inn khat ah kangno te tutpih nizan in zan thapai khannote kitu gilh geelh hi. Pawl khat te in lasa in, pawl khatte in ciamnuih gen in, paw khat te nu ngakte tawh akiho om in, pawl khat te tangvalte tawh aki nono tawh kim gamlum ngeeingai mahmah veve hi. Tuk hun laitak ahih man in ki leh paam ah ukeng (frog) ham ngeet ngeet in, guah zu thial thial in, buan nawi pian a ui talte ku ngaungau in hawm kawm pian lai hi.

Aksa tangcim nek hun pen zingsang nai 1:00 pawl hi pian zeel hi.Tut suak vet ding lah gim kisa, ciah ding lah khua zing mahmah leh, guah si zu zu pian thial thial ahih man in ki ciah ngam lo khat in kiom tek hi. Bucim net khit ciang ciamnuaih kimawl hun khat kihong in kimawl kik leuleu hi. Kimawl acim ciang in zing sang lam nai 3:00 bang hong hita ahih man in itmut zong kisuak pian ciat ta hi. Palw khat holim kawm mah in thutphah sau tung ah kingam kawm in ihmu buang, ihmu lo buang in om hi. Pawlkhat te nungakte phei tung ah a lu uh ngah in ciamnui kawm, holim kawm in kiho kawmkawm in ih mu ciaiciau ta uh hi.

Tua bang tawh ihmu buang, ihmu lo buan tawh zing lam hong nai tektek ta ahih man in a zing ciang in lo kuan na ding ah gimlua kha ding ahih man in ihmuh hun tawm khat bang nei kul sam hi. Innpua lam, buipuan nuai ah tutphah sau/ tom tung ah lu nga kawm, kun kawm ngeungau tawh ki om zezua ciat a, thokan (mosquito) lak thak si, sak leh khang, tak leh vei pan in hong pet in ki beng kawm, ihmu kawm zeel in om nil neel hi. Tua laitak makai te khat in "THO THO THO, LUNM TA DING" ci-in mi ihmu khempeuh phawng in phong gawp hi.

Pawl khat ihmu dikdeik in, pawl khat nak daapdaap lai hi. Pawl khat ih muding in kipan mengme ciaiciai laitak in "tho ta un, ihmu ta ding" cih kammal a zak uh ciang in ih mut hun tom khat lak na ding in a lawmte a phong kawikawipa a lawm dang ten' bang cih muh ding uh hiam? Zomi te in ih gam leh nam a ding in sem mahmah kisa, pawl khat in pawl khat in vei kisa mahmah hi.Eima tumtek in ki sem ciat leh ki vei ciat mah hi.A diakdiak tu hun bang in "Zomi te ki pumkhat ni, na sem khawm ni" cih kammal ih zak ciang in pawl khat te in ei a kipawl nailo maw, na a sem khawm thei nailo maw ci in tua dan hanthawtna thugente ki mukhial thei zaw sop hi"Kipawl tani, sem khawm tani, a gen ding ben hun hi nawn kei" kici hi.

Sem khawm mah ve hang aw, kipawl mah ve hang. Ahih hang in ih sep na dan, ih sep zia, ih kalsuan zia a ding bang nailo deuh hilo zaw lo ding hiam cih ngaihsut huai zaw htem hi.Ihmu napi thokang thak, guahzu lak leh zan khua vak miilmial meiphual gei a misi inn a tutpih- ihmu ding ki phong te tawh kibang hilo ihi hiam? Ihmu bel ihmukhin hi mah, ahih hang ihmut dan a mun man/ dik nailo deuh ahi diam? Ih ihmut hun manlo deuh ahi diam? Ih ihmun lohdingna pi ah ihmukha ihi hiam cih ngaihsut huai mahmah ta hi.Pilvang, bil puak hun ta in, a thu in ih gengen te sep khiat hunta hi.Ih minam sung ah ki pumkhat ding ih gengen te pen mun dang pan pat ding hi zaw lo in internet sung a thu kiza, thu kikum ei teng mah tung tawn pan in kipan masa ding ahi hi.

Tua ahih man in khat leh khat-
1. Ki theihsiam na
2. Thukhualna
3. Lungduaina leh
4. Ih kimuh khialhan, ih mawhkhakna tekimaisak hun khengval ta hilo ahi hiam?

Midang kipawlna pan hongkipan ding hilo in, ei teng sung mah pan hong kipan ding ahi hi. Ih sep na leh ih heina khempeuh ah ih om na ding mun, ih khol na ding mun, ih pai zia man/ dik ding mun ih tunma teng "THO THO THO, LUM TA DING" iki cih tohtoh mah kul lai phot mai ding hilo diam?Zomi sung ah biakna namkim kiom hi. Ih biakna makaite in eimi te pen Biakna sung ah ki pumkhat thie ngei ding hi lo hi hang ci in ih makai tampi te mah in gengen thapai uh hi.

Biakna sung ah kipum khat theilo citawh kawlbawl pah in a ban zop toh sawm nawnlo hilo ihi hiam? Ih ulian, biakna makaite in tawpkhakna (conclusion) hong bawl baih deuh salo ihi hiam?Biakna sung ah kipawl theilo cih tawp tawp in a ban zomto nawnlo mawk hi hangh.Biakna ah ih kipawl theih kei leh a bang lam ah kipawl thei ding cih pen biakna makaite mah in lam hong lak ding uh kisam hi. Tu cingte i lamlahna ah tu te pai ding hi a, lamlah lohna ah pailo zaw hamtang hi. Makaite in lungsim picing nei in, mailam tampi khual in khangthakte a ding lampi ih sialsak hun cing val khin lua hita lo hiam?

Guahzu, daipa, khua dam, thokang in ih tak ih vei pan hong pet in ihmu theilo in ihom mah bang in, tuni Zomite' mailam ih et ciang in ih tung, ih nuai, ih kim leh pam pan in hong ki pet suihsuih, hong ki nawnkai sak leihleih, khua lah hong dam pian, hong lau thawng sak, hong meidawisak pen gen khiat kullo in Zogam sung, Zogam pua ah om hilo ahi hiam? Biakna ah kipawl thei khinlo ihih leh Zomi leh Zogam min tawh kipawl thei bek ding hilo ihi hiam?Gam leh nam a ding in ih kipawl thei takpi mah hiam?

Hih thute pen naupang no khat tung pan hong kipan dingte hilo in, makai, tu laitak in makai, mipi tang a a ding, Gam, Nam makai, Biakna makaite zahtak U Liante in lam hong sial ding hilo ahi hiam? Midang kua in hong pan peuh mah ding hiam?Hih thute ngaihsun kawm in...Tho thou tho, lum ta dih ni maw innkuanpih Zomite aw...

Tg Sianpu Zangkong