"Taang Lungtup" by Sia Lianpi

Hih lasakna VCD Karoake hoih mahmah hi. Tulai ate taktak hi a, ettaak mahmah hi. La phuak - Zomi laphuak siam tuamtuamte hi [TSKhai, Zogam Lalpu, Evan. Do Khup, Suanno, JK Kam, Pum Pau, NS Piang leh Lianpi] . Lasa huhte zong Zomi lasiam te vive mah hi [Lialian, San Lun, Lam Lun, Khaino].

Tutung innlam ka ciahma in Sia Lianpi in Hong Kong panin hong gensa hi a, ka ngaih tak ciangin hoih kasa mahmah hi. Guwahati ah Sia Rev Dr JM Ngul Khan Pau, General Secretary, CBCNEI (www.cbcnei.com) in Lamka Khangno Kikhoppi a thugenna pan hong lei a thak liklek hong puak ka enpah uh a, Shillong omlai a Mopawi La ka ngaihna zel uh ka muh ciang ka lung hong leengsak mahmah hi.

A sunga la om teng:

1. Zomi in kei ka piang
2. Va pi dih aw (Ka zaideih aw va leeng diaidiai in)
3. Mopawi la
4. Pawlpi khat
5. Khristian zawlla (Ngaih Anglai ah - Ka saulim ah ngaihno hong khawl aw)
6. Upna (Upna in hong thalawpsak, hong gualzo sak)
7. December (Ka siangah va bang hong leeng aw)
8. Solomon la (ki itna la mah - Itluat ngaihno, hong enen nuam ing)
9. Thupha taktak (Pasian bek mah thupha taktak hi)
10. Taang Lungtup
11. Lungdam suahni (Happy birthday cih nopna)
12. Na lua (Ka neulai in zu bang ka mom ciil a kipan)
13. Nanglo in
14. Itna

A la te pawlkhat ka zaksa a om hangin pawlkhat a thak hi a, la tul ngeilo ding vive kikhum khawm ahih manin 'collection' tawh kibang hi. Tua manin a hoihna tuam diak hi.

A thulu Taang Lungtup ah a phuakpa Sia Zogam Lalpu in lasa Sia Lianpi thudotna dawngin a deihna -

"Taang Lungtup ka cih tak ciangin ah ZOMI te pasal khempeuh in ah, i ngimna ding i tup lianpi dingin ah i gam mah i lei mah i puahna ding ka cihna hi a, gamdanga pai sum le pai zong pilna siamna a zongte in, i pianna i pupa gamlei, khamtung gam mangngilh lo in ah, i ngah pilna leh hauhna te tawh i gam puahkik leng cih, i omnana i tunnana panin ah i gam phawk leng, puah leng, zuun lehang ni khat ni tak ciang in ah i gam pen hong khangto ding, tua hi Taang Lungtup ka cih"

ci hi. Hih la ah Jews te leh Zomi kalkaak in la phuak a, Israel gam leh Zogam, khamtung gam kilamdanna kiciantak in hong dawk ciangin lungsim ah nasep ding tam i neih lai dan hong phawksak hi.

A la masa pen Zomi in kei ka piang cih la ah Zo ngeina lam tuamtuam hong kilakte manpha mahmah a, tua bang laam lahna Zomi Video a kibawl a om tam (kei bang a mu nailo hi ing). A video et loh in a thupi na kigen siamlo hi. A video pan zong Zomi ngeina tampi thu in ki atkhia thei ding hi. A thupina ki thei panpan ding hi.

Ka zaideih aw va bang va leng diaidiai inla cih la pen a aw kaih pai dan nuam ahih manin lungsim hong awi diaidiai hi.

Mopawi La ah bel a lasak leh la thu kum tampi ka ngaihsa ahih manin hoih kasak sa hi a, a video ah a monu leh moliahte in kawlgam pai dan zuiin khedappum bulh lo (slipper) bek mah a bulh lai kimucian mahmah hi. Tua lo a video pen thupi thei mahmah hi. A dangte pen 'no comment' hi mai.

A ban ah Cingno te vanglai la minthang penpen 'Ka saulim ah ngaihno hong khawl aw' hi a, lungleng sak in, kingai cim theilo hi. Sau gen dah mai ning.....

It luat ngaihno la ah a hoih nono zolia tuamtuam hong kilanga, Zomi Miss Contest, Khuado 2005, Yangon ah a kizatna ah video clips hong kilanga, Zolia te in kilawm tak, kimuangtak a mipi maiah hong pai zetzet mawk uh bel...... amun ah om leeng camera kimeek mangngilh liang leh kilawm. Vaphual hon kikhawl bang. Ahih kei leh Sakhi in suaklu a gilvah taka a nek khit cianga lungmuang taka luitui luangsialsial lam a zuan phei hialhial tawh kibang. En leng kician zaw, gen siam ding hi kei......

Hih lasakna ah a tuam mahmah khat ka muh pen Pianni Lungdampihna La hi. Zomi te in mikang ngeina zui ici diam, tulai khantohna zui ici zaw diam, pianni nakpi takin kithupi bawl to ta a, tua ading la kiphuak tam nailo hi. Hih VCD ah tua bang la khat hong tuan khak zenzen pen manpha kasa hi. [Laisim in pilna i zon na lamah lawhcin lungdampihna la lam bel om lo leuleu hi].

A dah huai leh a a khasiat huai mahmah khat pen, NA LUA E (Zogam Lalpu phuah mah hi zel e) cih la hi. Ka nu leh ka pa in hong pattah sa hi ci a, Pasian mai ah ka zudawn, ka zatep, ..... ka gamtat hoihlo te ka pulak ding aw.....Na Lua e.......... a la ah ngai zaw mai in, a khasiat huai dan, a hoih dan, a la phuakpa siam dan. [Zomi Music Award om leh piak thuah dingin hoih hi. Zogam Lalpu la te mahmah in bun diak hi].

Hong ki it sak, hong kitawngsak zong itna mah hi ciin itna la zong na om hi.

Thukhupna ah:
Zomi gamdanga omte nuntakna, nasep leh omzia mel muh theih pawlkhat om a, Zomi innlam a omte nuntak zia zong a kicing ahih loh hangin kidawk a, anih in tawikhai leng a kikhiatna kimu thei hi. Tua kikhiatna, a kikal mun awng (gap) bangci beisak ding cih Taang Lungtup in a tup lianpen ahi hi.
****