Vaphual Vaak suak hi leh:

Vaphual Vaak suak hi leh leitung ah Vaak a tam mah ding maw. India khuapi a om teng zong a giahna ding uh kicingcing sam hi ding a, kibehlap leh a kicing toto veve diam. A lehlam in ngaihsun leng, Vaak Vaphual suak khin leh Vaphual a tam mah ding maw. Vaphual bu bawlna ding singkua hawm a kicing tam? Vaphual nek ding singgah a kicing tam?

Hi ciin ngaihsun kik leeng - cik mah ciang Vaphual lah Vaak suak ngei ke'n teh, Vaak zong Vaphual suak ngei ken teh, hibang a om thei dinga ngaihsutna zong 'ngaihsutna' bek hi a, om kha hi leh cih man bek hi. Om lo ding ahih manin ngaihsut zong a haihuai ahih loh hang, ngaihsutna khuak energy tampi bei a, khuak thahatna pawlkhat kizang ahih manin a tawl-huai maimai thu hi. Tua manin 'hi kha leh' cih te pawl tam ngaihsut ding hilo hi. Ahi te bek mah lim ngaihsut ding hi a, a hilo dingte lim ngaihsut taak lo tawh kibang hi.

Zomi khempeuh Kawl kisuak sawm, Burmanization hangin Zomi khempeuh in ahihna uh mangsak ding cih bang leitung ah a om thei ding thu hilo hi. Tua manin patauh ding thu hi in ka ngaihsun kei a, minam hihna aki khek thei ding cih bang hi peuhmah lo hi. Pumpi a ki thuzawh hangin lungsim kithuzawh ding a baih hetlo mihing in Pasian in Amah tawh a kibanga a bawl mite i hi hi. Tua manin minam hihna pen laidal tawh a min utbang akigelh hangin a taktak pen tua mipa, tua minu lungsim tawng ah om zaw hi. Kip zaw hi.

Zomi te zong Kawlgam Vaigam ah om in, laidal tungah i minam hihna a kiat ciangin Nationality = Indian, etc cih bangin aki at hangin a taktak ah ei mahmah in tuate hi hang iki ci tuan kei hi. Zomi bek hilo minam khempeuh (ethnic or ethnos khempeuh) in tuabang lungsim nei hi. I kipawlna minam min om a, mimal in kei tua minam hi ing i kicihna bulpi khat om leuleu hi.

Tua ahih manin tulai thuthang pawlkhat hangin lungkiatna ding hiin ka ngaihsut kei a, i minam hatsak semsem na ding nasep kisam cih bel hong lakzo mahmah hi in ka thei hi.

Ka gam hi i cih teekteek ut lohna gam ah zong kei tua minam hi ing ikicih mah bangin, ka pau hi i cih teekteek loh tawh zong ikiho kha thei a, ahi zongin i lungsim ah i mipih, sisan kizoppihte kithei in, tuate mah tawh kinainuam, ki it nuam, kikhawl nuam leh kideihsak in ma kipangkhawm nuam zaw veve hi. Zolai siam kei ta leng Zomi lungsim beilo a, Zopau pau siam kei taleng Zomi hihna kimangsak lo a, Zomin pua kei ta leng Zomi hihna a bei hituanlo hi. A bukimlo, i thanemna om cih man hi a, a mangthang hi nailo in puah phat theih lai hi cihna hi.

Tua ahih manin Zolai, Zopau, Zongeina khen lam ah zong Zomi a maimang cih bang hi peuhmah lo hi. Nu Julia Haukhek, Japan cih mah bangin hun khat ciangin Zogam ah i ciahkik hun hong tung peelmawh dinga tuani ciang i kihona kammalte tuni a kizang kampaute hi khollo maithei hi, i lai kikhakna te zong tuni a hi lo maithei a, i kizepna, i anduh dan, i deih leh i ngaihsut dan tuni bang lo maithei hi. Ahi zongin tuni ate mah nikhat ni ciangin kizuun kik dinga, kisin kikin, ki pholhkhia kik ding hi.

Leitung huihpi tuamtuam in Zomi hong nawk mah leh i lungsim ah cihtakna tawh nungta peuhleng, khangsawn dongin i minam a bei dingin ka tuat kei hi.

PS: Tua ahih manin Vaphual Vaak suak ngeilo dinga, Vaak Vaphual tang ngeilo ding hi. A kilimneih a hih leh bel nak nuihzat huailua ding hi.