Paul Khaipu gelh:

Zomite,

Minam vai nong gengen uh ciang i gennop mah tamsek zelin, himah leh tualak pan kei muhdan tawmkhat ong hawmkhia nuam ing. Mimal muhna hi in, hithei leh kikum diamdiam leng minam ading noptuamna khat aomtam cihna hizaw hi.

Zomi cih pen azai mahmah thu hi. Tua Zomi cih sung mahmah ah i telzawhloh leh i sandan kibatlohna tampi omlai hi. Gentehna, Zomi cihciang bangciang huamsak? cihpen i kidot den leh i buaipihden cileng khial loding hi hangh. Pawl khatten tua Zomi kuateng cih tawh i buaibuai sang sem zaw leng kici hi. Himah leh Zomi kuateng cihmah tawh i buaitoto zel lel hi. Zomi sungah i minam muhna leh sandante kibang kim thei nai lo ahihman mahin Zomi national movement nasiatak in om thei nai lo hi. Awareness ciangtan khat om mah taleh, Zomi bek cihtawh kuamah kiding ngam lo ciangkhat in i om hi. Zomi cihbek mah tawh tangpai vilvel lel leng cih pen mikim in kisang khin kim zolo abang hi. Ahun leh amun tawh kizui in mi tamtak Zomi ka hi, acite mah in mindang, puamdang tawh laihkik zel hi hangh. Kawl pau in gen leng minam min adang suak? Mang pau in gen leng minam min dang suaksak? ei pau ciang lan Zomi ka hi ci leuleu. Mi namdangte kampau in i minam min i gen leh i gelh ciang zong tua mite kammal zui in zatpih kul zenzen lo hi. Kawlten "Chin" ong cimah uh. Ahizong kei leh kei kawl khat tawh ka kiho ciang "Chin ka hi" ka va kicih kulse lo hi. "Kei Zomi hi ing" cihpah ding hilel hi. Akisap leh telcian in hilhbeh laiding ahihi. Mangte tawh kimuh kiho ciang zong, "I am Zomi" cihsuk pah ding hilel hi. Minam min pen utut thu in, kihopih mimal tawh kizui in laih ding hizenzen lo hi. Amau bangbang in ong sam taleh ei minam min mah en i zatden ding leh kepcing ding kisam hi.

Zomi kuateng i cihcih kalin, Zomi deihlo i sanggampihten amau deih min tawh nasem toto uh hi. Tua kalin ei Zomi deih phadiakteng in kiniamkhiat takin va zawnzawn, va zolzol hi hangh. Tua i va maietna hun sungteng pen amawkmai ahihi. I lawmten lah ong zatpih tuan lo, lah thusim nawn lo mai. Tua hileh bang i cihtam? Hun beisak sawnsawn in i va zawnzawn laidiam? ahih kei leh adeihteng Zomi cih tawh akihual thei teng kihual a, Zomi deihteng ading na i sem lel diam? I minam in bang anoptuampih zaw tam?


Minam vai ah thusaupi khual ding kisam mah leh ahun zui in, i kikhel theih ziauziau ding zong kisam hi. Minam ading ahihnak leh min siat ngam zong kisam hi. Minam noptuam nading ahihnak leh namdangten ong mudah phial zongin na minampihten ong it peuh leh bang phamawh hiam? Pawlkhatten bel minamdante muhdah ding lau in a Zomi pih sanggate khawng tuambawl, huai nuam lo cihdan om mawk hi. Minam it kici thei lo hi.Innkuan sung it masa lo in na vengte it lo ding hi teh. Minam vai ah i minam min leh minam deihna pen midangte deih leh nget zui in zuih ding hi lo hi. Tua ahihman, Zomi ka hi aciteng in Zomi tawh kalsuan khawm ciata, Zomi ading sepkhop ding hun hita hi. Khualui, beh leh phung leh awkaih kibatlohna lel tawh kikhen ding hinawn lo hi. Ei sunga namneuneuteng leh khua neunueteng peuh i kiliansak thei zawmah lai hi. Ei khua pau lel khawng tawh mipi meeting khawng ah i pau duadua den uh hi. Minampi lungsim nei nai lo hi hangh. Minampi lungsim pua leng minampi pau mah i pau lel ding hi.

Minam min leh pau i kibangsak (i kizatkhoppih) mateng tua tegel in thu hong khen den ding hi. Pau kibanglo minih cik mah ciang nam khatin dingkhawm zo ngei lo ding hi. Pilvang ni. Minampi lungsim nei ni. Pau kibang zatsawm ni. Tu a kong zat lai leh pau pen i minampi pau hipah hi.

Veina tawh,
Paul Khaipu
Sydney